taqdeer

kyoN "Munir" apanii tabaahii kaa ye kaisaa shikavaa
jitanaa taqdeer meN likhaa hai adaa hotaa hai
[Munir Niazi]

taqdeer kaa shikavaa be-maanii jeenaa hii tujhe manzoor nahiiN
aap apanaa muqaddar ban na sake itanaa to ko_ii majboor nahiiN
[Majrooh Sultanpuri]

deewaanaa banaanaa hai to deewaanaa banaa de
warnaa kahiiN taqdeer tamaashaa naa banaa de
[Behzad Lucknawi]

is ziNdagii se ham ko na duniyaa milii na deeN
taqdeer kaa mushaahidaa karate guzar ga_ii
[Tilok Chand Mehroom]

[diiN = religion; mushaahidaa = inspection]

laakhoN kii sunaa tum ne taqdeer saNvaarii hai
mujh se yahii kah dete ab ke terii baarii hai
[Syed Shafaq Shah Chisti]

rusvaa_ii to waise bhii taqdeer hai aashiq kii
zillat bhii milii ham ko ulfat ke fasaane se
[Saeed Rahi]

[rusvaa_ii = bad name; zillat = insults]

taqdeer ke chehare kii shikan dekh rahaa hooN
aa_iinaa-e-haalaat hai duniyaa terii kyaa hai
[Sagar Siddiqui]

[shikan = frown]

kis tarah paayaa tujhe phir kis tarah khoyaa tujhe
mujh saa munkir bhii to qaa_il ho gayaa taqdeer kaa
[Ahmed Faraz]

[munkir = atheist; qaa_il honaa = to be a fan/follower]

Khudii ko kar buland itanaa ki har taqdeer se pahale
Khudaa bande se Khud poochhe bataa terii razaa kyaa hai
[Allama Iqbal]