mehfil

baat karanii mujhe mushkil kabhii aisii to na thii
jaisii ab hai terii mehfil kabhii aisii to na thii
[Bahadur Shah Zafar]

baaG kis kaam kaa jis meN guloN ko shamshaad na ho
lutf detii nahiiN be-shiishaa-o-saaGar mehfil
[Unknown]

mehfil se uTh jaane waalo tum logoN par kyaa ilzaam
tum aabaad gharoN ke vasii maiN aavaaraa au badanaam
[Unknown]

mehfil-e-yaaraaN meN deewaanoN kaa aalam kuchh na poochh
jaam haathoN meN uThaayeN to chhalakanaa chaahiye
[Ibrahim Ashk]

hu_ii ham se Khataa terii mehfil meN aa baiThe
zameeN kii Khaak ban aasmaaN se dil lagaa baiThe
[Unknown]

muhabbat karane waale kam na hoNge
terii mehfil meN lekin ham na hoNge
[Hafeez Hoshiarpuri]

mehfil meN baar baar kisii par nazar ga_ii
ham ne chhupaa_ii laakh magar usii par nazar ga_ii
[Aga Bismil]

uTh ke mehfil se mat chale jaanaa
tum se raushan ye konaa konaa hai
[Wajida Tabassum]

jab jaam diyaa thaa saaqii ne jab daur chalaa thaa mehfil meN
vo hosh kii sa_at kyaa kahiye kuchh yaad rahii kuchh bhool gaye
[Sagar Siddiqui]

is shahar meN kis se mileN ham se to chhooTii mehfileN
har shakhs teraa naam le har shakhs divaanaa teraa
[Ibne Insha]

tere hote huye mehfil meN jalate haiN chiraaG
log kyaa saadaa haiN sooraj ko dikhaate haiN chiraaG
[Ahmed Faraz]

mehfil meN log chauNk paRe mere naam par
tum muskuraa diye merii qiimat yahii to hai
[Hashim Raza]

tanhaa tanhaa ham ro leNge mehfil mehfil gaayeNge
jab tak aaNsoo paas raheNge tab tak geet sunaayeNge
[Nida Fazli]

bikharaa paRaa hai tere hii ghar meN teraa wajood
bekaar mehfiloN meN tujhe DhooNDhataa hooN maiN
[Qateel Shifai]

yooN taRap kar dil ne taRapaayaa sar-e-mehfil mujhe
us ko qaatil kahane waale kah uThe qaatil mujhe
[Jigar Moradabadi]

shaayad mujhe nikaal ke pachhataa rahe haiN aap
mehfil meN is Khayaal se phir aa gayaa hooN maiN
[Abdul Hameed Adam]

chal ai ham_dam zaraa saaz-e-tarab kii chheR bhii sun leN
agar dil baiTh jaayegaa to uTh aayeNge mehfil se
[Saqib Lucknawi]